Baat 2005 ki hai.
Purane hyderabad me Charminar road se lagi ek colony me teen kamron ka ek chhota sa makaan tha. Ghar ke aage ek bada aangan tha jisme ek badi si chattaan rakhi hui thi, pata nahi kab se yahan thi. Uske paas hi ek amrood ka ped tha, jo us chattaan ke saamne chhota hi maaloom padta tha. Ghar ke chaaron taraf fencing ki gayi thi jiske saath kataar me dher saare phoolon ke paudhe the. Ye bageecha us chhote se ghar ko behad khoobsurat bana deta tha.
Gate par name plate Farhan Akbaar ki thi, par us ghar me Aradhna Karandikar aur unka pariwar rehta tha. Aradhna ji peshe se hyderabad university me Hindustani classical sangeet ki professor thi.n aur saath hi colony ke bacchon ko classical singing bhi sikhaati thi.n Unki Zubaan me to saraswati rehti thi, par chehre par maano durga rehti thi. Jitne bandhe hue unke sur the, utna hi bandha hua tha unka kataaksh. Meri maanein to unhe sangeet ke saath saath kataaksh ka bhi professor declare kar dena chahiye. Riyaaz ke waqt agar humne sur sahi lagaye tab bhi unke chehre ko dekh kar yun lagta tha ki humne galti kar di hai, aur agar koi bhi sur hila, to unke chehre se yun lagta tha jaise isse behtar is raag ko gaaya hi nahi jaa sakta. Kaan to class ke baad marode jaate the.
Kitne hi besuron ko sureela bana diya tha unhone! Kabhi kabhi to Biju bhi gate se sur me aawaaz lagata tha. Sab hans dete the. Biju waise to bhikhari tha, par khane ke badle professor ke kuchh chhote-mote kaam kar diya karta tha. Dubla-patla, aur hasmukh, fatee kameez, par dil kushada. Kabhi-kabhi mai apna tiffin Biju ko de diya karta tha, Uski chehre ki khushi aur hawa me haath hilate hue aashirwaad dene me hi mera pet bhar jaata tha.
Biju, zyadatar paas wale chaurahe par hi dekha jaata tha. Flyover ke neeche hi uski duniya thi, usi signal par kamaana, usi signal ke paas wali Sohail hotel me kuchh khaa lena, aur aaraam ke waqt us signal ki saari gatividhiyon ko itne dhyan se dekhna jaise us afra-tafri me kisi ko dhundh raha ho. Aankhein bhale hi dhans gayi ho, par nazar bahut tez thi uski. Nazar to waise meri bhi ab bhali-changi ho gayi thi. Aankhon ka operation hua aur chashma hatt gaya. Par is operation ki wajah se kuchh dino ki classes chhoot gayi thi, isiliye mai roz class ke baad aadha ghanta aur ruk kar chhooti hui cheezon ki practice karta tha. Is session me professor ka rukh kaafi alag hota tha. Inhi extra classes me maine unhe theek se jaana. Bahar se jitni sakht asal me utni hi mazakiya. Pichhle mahine ek naya Scooter bhi le liya unhone - TVS Champ. Chalana bhi seekh liya, aur mujhe peechhe baitha kar haat ki ek dukan se ice cream bhi dilwa di. Khud ke liye unhone chappalein khareedi thi. Bada khush the hum dono us din. Aakhir maheena bhi Ramzan ka tha, market me alag chahal-pahal thi. Har chehra humari hi tarah khush nazar aata tha.
Maine to ice cream kha kar apni khushi bhuna li thi, par professor ki khushi kuchh din hi chal paayi. Aaj subah hi college jaate waqt chauraahe par unki ek chappal paanv se phisal kar gir gayi. Chauraaha paar karke scooter roka, par traffic ki wajah se beech chauraahe par jakar chappal uthana namumkin kaam tha. Kuchh der tak unhone caron ke pahiyon ko unki chappal ko raundte hue dekha, phir pareshan hokar apni dusri chappal bhi wahin utaar kar nange paanv hi college chali gayi. College me kisi ne nange paanv aane ka sabab puchha to usse Mangalvar vrat ka bahana de diya. Aur unhone pran liya hai ki ab se sandal hi pehanengi. Khair! isse Biju ki khushkismati samjho, pehle usse ek chappal mili, aur phir uski tez nazron ne dusri chappal bhi dhundh nikali. Ab uske badan par ye 200 rupay ki chappalein hi sabse mehnga aabushan hain.
Shaam ko class se laut-te waqt maine flyover ke neeche Biju ko dekha tha, khush lag raha tha, par bhookha tha. Mera tiffin aaj khali tha, bus me chadhte waqt maine kal usse tiffin dene ka wada kiya. Bus chal padi. Kuchh der baad wahan par ek aur ladka aaya, Uske paas bhi ek tiffin tha. Biju ne socha shayad kuchh intezam ho jaaye, par us ladke ne tiffin dene se inkaar kar diya. Biju haar kar phir se sohail hotel ki taraf badh gaya, phir se maalik ki gaali sunega, aur badle me kisi joothan se apna pet bharega. Ye usse pasand nahi tha, par marta kya na karta. Kuchh der baad wo tiffin wala ladka bhi sadak paar karke hotel par aa gaya. Biju ki nazrein uss par gad gayi. Us ladke ne ek biryani ka order diya aur andar baith gaya. Biju bahar se badi shaq ki nigaahon se usse dekh raha tha. Jis baareeqi se wo signal ki har gatividhi ko dekhta tha, usi baareeqi se usse logon ke chehre padhne bhi aate the. Zara hi der me bina biryani liye wo ladka waha se nikal gaya, Biju ne table par dekha to wahi tiffiin ka dabba wahin rakha hua tha. Biju ko samajhte der nahi lagi, wo tapaak se table ki taraf bhaaga. Maalik aur do chaar grahakon ne Biju ko rokne ke liye aawaaz lagayi. Wo ladka chauraahe se door bhaag rha tha. Biju tiffin uthakar bahar ki taraf dauda. Hotel ke gate se kuchh meter door hi aaya tha, ki tiffin phatt pada. Biju ke cheethde ud gaye, par hotel ke kaafi log bach gaye. Dhamaake ke shor se bhagdad mach gayi. Jise jahan rasta mila wo wahan bhaaga. Kisi ke thaile chhoot gaye, to kisi ki topi.
Us dhamaake me Biju ki jaan aise nikli jaise dhamaake ke baad bhaagte hue logon ke paanvon se unki chappal. Us chauraaste par ab saikdon chapplein padi hain. Par Biju nahi hai. Hota to shayad sabhi chapplon ki jodi mil jaati.
- Gautam
Comments
Post a Comment